ငယ်စဉ်က ဆန်မလောက်၍ ပြောင်းဆန်ရောစားခဲ့ရသူ၊ ဝတ်စရာ ပုဆိုး ၃ ကွင်းသာ ရှိ ခဲ့သူ၊ ကျောင်းဗလာစာအုပ်မလုံလောက်၍ တစ်အုပ်လျှင် ၂ ဘာသာ ရေးခဲ့ရသူ၊ အမိုးမလုံ အကာမလုံ ဝန်ထမ်းအိမ်ယာတွင် နေထိုင်ခဲ့ရသူ၊ နေ့စဉ်ပဲချဉ်ရည်၊ ငရုတ်သီးဟင်းကို စားခဲ့ရသူ၊ မိခင်ဆေးဖိုး မတတ်နိုင်၍ မိခင်ကို ဆုံးရှုံးခဲ့ရသူ၊ စာထူးချွန်သော်လည်း ဖခင်အလုပ်အတွက် စာမေးပွဲကို အမြဲ နောက်ကျဖြေခဲ့ရသူ ထိုထိုအခြေအနေမှ ယခုအခါ နိုင်ငံကျော် အနုပညာရှင်၊ သဘင်ပညာရှင်များ အစည်းအရုံး (ဗဟို) ဥက္ကဋ္ဌ၊ စစ်ကိုင်း ယူနိုက်တက် ဘောလုံးအသင်းပိုင်ရှင်၊ တောက်ပသော ဓူဝံကြယ် အပြည်ပြည်ဆိုင်ရာ ကုမ္ပဏီလိမိတက်ပိုင်ရှင်အဖြစ် တက်လှမ်းနိုင်ခဲ့သူ ဇာတ်မင်းသား ဖိုး ချစ်၏ ဘဝဖြတ်သန်းမှုကို အစ်ကိုဖြစ်သူက မှတ်တမ်းတင် ရေးသားထားခြင်း ဖြစ်သည်။ အောင်မြင် မှုဆိုသည်မှာ ရိုးသား ကြိုးစား လုံ့လဝီရိယထားမှု၏ အကျိုးခံစားခွင့်ဆိုသည်ကို ဖိုးချစ်၏ ဘဝ ဖြတ်သန်းမှုမှတဆင့် သိရှိနိုင်မည်ဟု စာအုပ်စီစဉ်သူက ဆိုထားသည်။